Miqren sadəcə «güclü baş ağrısı» deyil — beyinin ağrı siqnallarını emal etməsi ilə bağlı nevroloji xəstəlikdir. Tutma zamanı ağrı adətən başın bir tərəfində olur, döyünən xarakter daşıyır və fiziki aktivliklə güclənir. Tutmalar 4 saatdan 72 saata qədər davam edə bilər.
Əlamətləri
- Orta və ya şiddətli, döyünən baş ağrısı — çox vaxt bir tərəfdə
- Ürəkbulanma, bəzən qusma
- İşığa, səsə, bəzən qoxulara həddindən artıq həssaslıq
- Hərəkət etdikdə, pilləkən qalxdıqda ağrının artması
- Bəzi pasiyentlərdə aura: ağrıdan 20–60 dəqiqə əvvəl gözdə işıq zolaqları, ləkələr, müvəqqəti görmə pozğunluğu və ya əldə keyimə
Tutmanı başlada bilən amillər
Hər pasiyentdə fərqlidir, amma ən çox rast gəlinənlər: yuxu rejiminin pozulması, ac qalmaq, susuzluq, stress və ya stressdən sonrakı rahatlama dövrü, hormonal dəyişikliklər, bəzi qidalar və içkilər, parlaq işıq, hava dəyişikliyi, boyun əzələlərinin gərginliyi. Tutma gündəliyi aparmaq — nə vaxt, nədən sonra başladığını yazmaq — həm diaqnoza, həm də müalicəyə kömək edir.
Nə vaxt təcili həkimə müraciət etməli
Aşağıdakı hallarda gecikdirmədən müraciət edin:
- Həyatınızın «ən güclü» baş ağrısı, qəfil başlayan «ildırım» ağrı
- Baş ağrısı ilə birlikdə hərarət, boyun sərtliyi, huşun dumanlanması
- Əl-ayaqda güc itkisi, danışıqda pozulma, ikigörmə
- Travmadan sonra başlayan baş ağrısı
- 50 yaşdan sonra ilk dəfə başlayan və ya xarakterini dəyişən baş ağrısı
Müalicə
Miqrenin müalicəsi iki istiqamətdə aparılır: tutmanı kəsmək və tutmaların sayını azaltmaq (profilaktika).
- Həyat tərzi. Müntəzəm yuxu, gün ərzində kifayət qədər su, öyün atlamamaq, stressin idarə olunması tutmaların sayını real şəkildə azaldır.
- Dərman müalicəsi. Tutma zamanı işlədilən və profilaktik preparatlar fərqlidir. Ağrıkəsicilərin həftədə bir neçə dəfədən çox işlədilməsi dərmandan asılı baş ağrısı yarada bilər — bu, ən çox rast gəlinən səhvlərdəndir.
- Girişimsel üsullar. Dərmanla idarə olunmayan, tez-tez təkrarlanan hallarda ənsə siniri blokadası, sfenopalatin qanqlion blokadası və ya radiofrekans müalicəsi müzakirə edilə bilər.
Miqren baş ağrısının bir neçə növündən biridir. Düzgün müalicə üçün əvvəlcə ağrının növü dəqiqləşdirilməlidir.