Ayaq 26 sümük, çoxsaylı bağ və vətərdən ibarət mürəkkəb quruluşdur və bütün bədən yükünü daşıyır. Ağrının yeri çox vaxt səbəbi göstərir: daban altı, dabanın arxası, ayaq biləyi və ya barmaq nahiyəsi.
Ən çox rast gəlinən səbəblər
- Plantar fassiit — daban altında, xüsusən səhər yataqdan duranda ilk addımlarda kəskin ağrı
- Axilles tendiniti — dabanın arxasında ağrı və şişkinlik
- Burxulma sonrası davamlı ağrı — bağların düzgün bərpa olunmaması
- Tarsal kanal sindromu — daxili topuq arxasında sinirin sıxılması, ayaq altında yanğı və keyimə
- Morton nevroması — barmaqlar arasında sinir qalınlaşması
- Artroz, podaqra, diabetik sinir zədələnməsi
Nə vaxt həkimə müraciət etməli
Travmadan sonra ayağa basa bilmirsinizsə, görünən deformasiya varsa, ayaq qızarıbsa və hərarətlə müşayiət olunursa, yaxud diabetiniz varsa və ayaqda yara/keyimə yaranıbsa — vaxt itirmədən müraciət edin.
Diaqnoz
Ayağın quruluşu, yeriş, ağrılı nöqtələr qiymətləndirilir. USM vətər və bağ zədələrini, sinir qalınlaşmalarını real vaxtda göstərir; lazım olduqda rentgen və MRT əlavə olunur.
Müalicə
- Ayaqqabı seçimi və ortopedik altlıq — xüsusən plantar fassiitdə
- Dartılma (gərilmə) məşqləri və fizioterapiya
- USM nəzarəti altında hədəflənmiş inyeksiya
- Uyğun hallarda PRP müalicəsi
- Davamlı sinir ağrılarında sinir blokadası və ya radiofrekans müalicəsi
Daban ağrılarının böyük hissəsi düzgün məşq və yük tənzimi ilə cərrahiyyəsiz keçir; əsas şərt müntəzəmlikdir.
